Hozir

Bu sahifa “hozir men nima bilan bandman” degan savolga javob beradi. Uni oyiga bir marta yangilab turaman.

Ish va oʻqish

Ordinaturaga hujjatlarimni topshirdim. Endi kutish davri — va ochigʻi, kutish oʻqishdan qiyinroq ekan. Kunimni band qilib turish uchun oʻzimga jadval tuzib oldim.

Ertalabki ikki soatni nazariyaga ajratyapman. Kunning qolgan qismi tartibsizroq, lekin shu ikki soat tegilmas.

Oʻqiyotganlarim

Oʻtkir Hoshimovning “Daftar hoshiyasidagi bitiklar” kitobini sekin oʻqiyapman. Kuniga bir-ikki sahifa. Bu kitobni shoshib oʻqib boʻlmaydi.

Yonida bitta darslik ham bor, lekin u haqda yozadigan qizigʻi yoʻq.

Kichik narsalar

• Ertalab kofe oʻrniga koʻk choy ichyapman. Uchinchi hafta.
• Yakshanba kunlari telefonni kechgacha ochmaslikka harakat qilyapman. Toʻrt haftadan ikkitasi muvaffaqiyatli.
• Yangi daftar boshladim. Har safar yangi daftar boshlaganimda hayotim tartibga tushadigandek tuyuladi. Bu, albatta, shunday emas.

Bu yerda nima yoʻq

Ijtimoiy tarmoqlarda kamroq boʻlyapman. Agar javobim kechiksa — sabab shu, xafa boʻlmang.